ХОҚ Пекин-2022 Ташкилий қўмитасининг фаолиятига юқори баҳо берди

Унда комиссия аъзолари ташкилий қўмита коронавирус пандемияси шароитларида эришган натижаларини юқори баҳолади.

Мувофиқлаштирувчи комиссиянинг раиси кичик Хуан Антонио Самаранч Пекин-2022 Ташкилий қўмитаси томонидан эришилган натижалар учун Хитой томонига миннатдорчилик билдирди. Ташкилий қўмита коронавирус инқирози шароитларида фаолиятини давом эттиришга қандай мослашганлигини ҳамда қатор истиқболли лойиҳалар тўғрисидаги янгиланган маълумотларни тақдим этди.

Видеоконференцияда, шунингдек, халқаро спорт федерациялари ва Бутунжаҳон параспорт вакиллари ҳам иштирок этдилар. Мулоқотда Олимпия ўйинлари объектларидан бири – Пекиндаги «Ice Jar» ёпиқ машғулот марказида олиб борилаётган ишлар тўғрисида ҳисобот берилди. Шу йил май ойида қуриб битказилган иншоотда керлинг ва шорт-трек учун халқаро стандартга эга муз саройи бор. Ушбу объектда Хитойнинг конькида учиш ва фигурали учиш бўйича спортчилари машқларини ўтказади.

Пекин-2022 Ташкилий қўмитаси Яньциндаги Миллий тоғ чанғи маркази ва Олимпия қишлоғининг шу йил охирига бориб қуриб битказилишини маълум қилди. Мамлакатда қишки спорт турлари билан шуғулланишга 300 миллион кишини жалб қилиш мақсадида “Пекин-2022” дастури доирасида мактаб ўқувчиларининг Миллий тоғ чанғи марказига ташрифлари уюштирилади.

Қолаверса, онлайн учрашувда кўнгиллиларни жалб этиш бўйича эришилган натижалар ҳам муҳокама қилинди. Ташкилий қўмита вакиллари ҳомийлик, кўнгиллилар ва қишки Олимпия ўйинлари билан боғлиқ хизматлар кўрсатиш учун 800 мингдан кўпроқ буюртма олганликларини маълум қилишди.

Ўйинларнинг тантанали очилиш маросими 2022 йил 4 февралда бўлиб ўтади. Мазкур қишки Олимпия ўйинларининг баҳслари учта асосий кластер – Пекиннинг ўзи, Яньцин ва Чжанцзякоуда ўтказилади. Шу тариқа Пекин ҳам ёзги, ҳам қишки Олимпия ўйинлари мезбони бўладиган жаҳонда биринчи шаҳарга айланади.