Хосила Раҳимова, Лола Аҳмедова ёхуд Чироқчида кураш ва улоқ-кўпкари бўйича беллашувлар ўтказилди ФОТОРЕПОРТАЖ

Бу анъана бизга олис ўтмишдан бобо мерос. Айнан йигитларнинг зўри, кучлилари, чаққон ва чапдастликлари ҳам тўй-сайиллардаги кураш, кўпкари беллашувларида аниқланган. Бугун ҳам худди шундай бўлди. Алпларнинг зўри кураш майдонида аниқланади.

Қашқадарё вилоятининг Чироқчи туманидаги Ҳайиткул, деб ном олган қир-адирликларида қишлоқ хўжалиги ходимлари куни муносабати билан Ҳосил байрами бўлиб ўтди. Мазкур байрамда  кураш ва улоқ-кўпкари ҳам ташкил этилиб, кучли алплар сараланди.  

Байрам дастури дастлаб, Чироқчи туман ҳокими Хуррам Жўраевнинг тумандаги қишлоқ хўжалиги ходимларини, бобо-деҳқонлар ва халқ сайлига йиғилган барча-барчани байрам билан қутлашидан бошланди.

Шундан сўнг курашчи - полвонларнинг беллашишига, чавандозларнинг кўпкарида от чоптиришларига, таниқли санъат усталарининг куй-қўшиқларига бирин кетин навбат берилди.

Кураш баҳсларида мамлакатимизнинг ўнлаб номдор полвонлари  ғолиблик учун майдонда бор маҳоратларини ишга солишди. Туман ҳокимлиги томонидан вилоят белбоғли кураш федерацияси раиси, Чироқчи туман халқ таълими бўлими мудири, Бутунжаҳон курашлар олами (UWW) бўйича халқаро тоифадаги ҳакам Фарҳод Жуманов бошчилигидаги ҳакамлар гуруҳига кураш баҳсларини баҳолаб бориш, бошқариш ишониб топширилган эди.

Ишонч оқланди, тайинланган ҳакамлар полвонларнинг ҳар бир чиқишини муносиб баҳолаб боришди. Рақибини “ҳалол” енган Сарвар, Фазлиддин, Аброр каби номдор полвонлар белгиланган пул мукофоти ва турли қимматбаҳо совринларга эга бўлаверишди. Миллий курашнинг кўп сонли ашаддий мухлислари эса полвонларни олқишлашдан чармади.    

Улоқ-кўпкарида ҳам худди шундай бўлди. Ҳатто, қўшни вилоятлардан келган чавандозлар билан тўлиб тошган кўпкари майдонида отлар дупуридан куч олган алплар ўртага ташланган улоқни якка айириб, қиймати қиммат бўлган совринларни қўлга киритишди.

Вилоят улоқ-кўпкари федерацияси раиси, таниқли чавандоз Илҳом Чоршанбиев ва унинг ёрдамчи ҳакамлари томонидан отлар ва йигитларнинг кучлилари шу тариқа аниқлаб борилди.

Шу куни байрамга келган одамлар миллий қадриятларимиз, анъаналаримиз  акс этган саҳна кўринишлари, миллий спорт турларимиз бўйича мусобақаларни томоша қилиб, шодумон кайфиятда манзил-маконларига қайтишди.

Илҳом РАҲМОНОВ тайёрлади