Яна икки ўзбек дзюдочиси Тбилисидаги "Катта Дубулға"да медаль қўлга киритди, умумжамоа ҳисобида тўртинчи бўлдик

Мусобақада -90 кг вазн тоифасида юртимиз шарафини ҳимоя қилаётган Давлат Бобонов бронза медали учун кечган баҳсда Исроил вакили Кочман Лини мағлубуятга учратди ва Тбилиси «Катта Дубулға» турнири бронза медали соҳибига айланди. 

-100 кг вазн тоифасидаги биринчи бронза медали Ўзбекистон терма жамоаси аъзосига насиб этди. Истеъдодли дзюдочимиз Музаффарбек Тўрабоев бронза медали учун кечган беллашувда россиялик Нияз Билаловни қўшимча бўлимда қўлга киритилган вазари баҳоси эвазига мағлубиятга учратди ва бронза медали соҳибига айланди.

Шу тариқа, Тўрабоев қаторасига иккинчи турнирда ҳам бронза медалини қўлга киритди. Музаффарбек уч ҳафта аввал Тошкент «Катта Дубулға» турнирида ҳам бронза медалига эга чиққанди.

Эслатиб ўтамиз, бунгача Сардор Нуриллаев олтин, Кемран Нуриллаев кумуш, Гулноза Матниязова эса бронза медалини қўлга киритганди. 

Шу тариқа, Тбилисидаги "Катта Дубулға"да 1 та олтин, 1 та кумуш ва 3 та бронза медалини қўлга киритган Ўзбекистон терма жамоаси умумжамоа ҳисобида тўртинчи бўлди.