Янги промоушен: қоидаларсиз жанг, хеч қандай вазн тоифалари йўқ. Барчаси Ван Дамм фильмларидек (ФОТО + ВИДЕО)

Унда спортчилар қўлқопларсиз жанг қилишади, вазн тоифалари, раундлар ва вақтлар белгиланмаган. Фақат нокаут эвазига ғалаба қозониш мумкин. 

У ердаги муҳит эса ақлбовар қилмас даражада бошқача.

WOTORE янги промоушен, биринчи турнирини 2020 йилнинг 18 январида ўтказган. Ташкилотчиларнинг маълум қилишича, ўша кунги пуллик трансляциялардан 1 077 147 Польша злотийси ( 2 696 505 994 сўм) даромад олинган. Ютубда миллиондан ортиқ томоша қилинган, медиада минг маротабадан ортиқ эслаб ўтилган. 

Промоушеннинг энг аҳамиятли жиҳати - у ердаги муҳитда. Арена 9х9 метрдан иборат. Атрофида эса чуқурлик. Жангчилар барабан садолари остида чиқиб келишади. Барчаси 90-йиллардаги Жан-Клод Ван Дамм иштирокидаги "Саргузашт излаб" фильмини ёдга солади. 

Қоидалар ҳам ўхшаш: турли яккакураш спорт турларини ўзлаштирган 8 спортчи 50 минг злотий (125 168 895 сўм) учун кураш олиб боришади - ғолиб фақат битта. Қўлқоплар йўқ, тирсак, тизза ва бош билан ҳам зарба берса бўлади. Жангда фақат муддатидан олдин ғолиб чиқиш мумкин: жанг кимдир нокаут бўлгунича, мағлубиятни тан олгунича ёки давом эттиришни рад этгунича ўтказилади. Раундлар ҳам йўқ.

23 май кунги турнирда бокс, кикбоксинг, жиу-житсу ва ММА спорти билан шуғулланувчи спортчилар иштирок этишди. Турнирда Михал Пастернак ғалаба қозонди. У турнир давомида 37 сония ичида 125 киллограмлик Демиан Берини, финалда эса 2 дақиқа 27 сония ичида Кацпер Миклошни бўғиш усули орқали мағлуб этди.

WOTORE 2 турнири давомида ММА тарихида илк бор қизлар қўлқопсиз жанг қилишди: Клаудия Сигула Каролина Собекка қарши.

Ҳозирча ташкилотчилар пуллик трансляциялардан қанча даромад олинганини эълон қилишмади, лекин ушбу формат польшалик томошабинларга маъқул келди: турнирни ўша кеча 10 минг томошабин бевосита кузатди.