Яхши хабар! Богдан Гусков UFС 311 турнири кардида қолди, унга янги рақиб берилди

Хабарингиз бор, UFC 311 турнири доирасида ҳамюртимиз Богдан Гусков ҳам жанг ўтказиши керак эди. Аммо, жангга бир ҳафта қолган бир пайтда 32 ёшли аралаш яккакураш устамизнинг рақиби, ҳам жамоадоши бразилиялик Жонни Уокер жароҳат сабаб сафдан чиққанди. 

UFC матчмейкерлари жангга қисқа фурсат қолганига қарамай, Богдан Гусковга янги рақиб топиб беришди. Энди ангренлик юртдошимиз UFC 311 турнирида америкалик 29 ёшли Билли Элеканга қарши октагонга чиқади. Билли ММАда 8 ғалаба (4 таси нокаут), 1 дуранг ва 1 мағлубият қайд этган. Элекан сўнгги жангини ўтган йилнинг июль ойида Lights Out Xtreme Fighting турнири доирасида Журилл Симмонсга қарши ўтказиб, рақибини биринчи раунднинг ўзида техник нокаутга учратганди. Богданга қарши жанг у учун UFC промоушенидаги дебют бўлади.  

Эслатиб ўтамиз, Богдан Гусков UFC Vegas 91 турнирида америкалик Райан Спэннни иккинчи раундда техник нокаутга учратиб, кичик шов-шув сабабчисига айланганди. Бу Гусковнинг ММАдаги 16-ғалабаси бўлганди. Шунингдек, унинг ҳисобида 3 та мағлубият ҳам бор.