Йўғе?! 2032 йилги Олимпиадада эшкак эшиш мусобақалари тимсоҳлар яшайдиган дарёда ўтказилиши мумкин

2032 йилги Олимпиада 23 июлдан 8 августгача Австралиянинг Брисбен ва Квинсленд шаҳарларида ўтказилади.

Квинсленд ҳукумати эшкак эшиш мусобақаларини Рокгемптон шаҳри яқинидаги Фицрой дарёсида ўтказишни таклиф қилди. Бу дарё тимсоҳлар яшайдиган ҳудуд сифатида танилган.

Бунгача ушбу жой турли мусобақалар олдидан эшкак эшувчиларнинг тайёргарлик базаси сифатида фойдаланилган.

"Рокгемптонда эшкак эшиш мусобақалари  ўтказилишини эълон қилишдан жуда мамнунман. Уларни Сиднейга кўчириш бўйича таклифлар бор эди, лекин бу Олимпиада шукуҳини бу ерда қолдириш учун ажойиб имконият, биз бу имкониятдан фойдаланишимиз керак", — деди Квинсленд бош вазири Дэвид Кризафулли.

Крокодилларни кўпайтириш билан шуғулланадиган ферма эгаси Жон Левернинг айтишича, мусобақалар хавфсиз бўлади.

"Тимсоҳлар асосан кечқурун фаол бўлади, мусобақалар эса кундузи ўтказилади. Улар асосан қирғоқда ов қилади, пойгалар эса чуқур сувда бўлади. Дарёга йўл олганингизда автобус остида қолишингиз эҳтимоли тимсоҳ ҳужумига учраш эҳтимолидан кўра юқори", — деди у.