«Ёшлар куни»га бағишланган турли мусобақалар ўтказилмоқда

Ушбу сана муносабати билан Миллий олимпия қўмитаси, Ўзбекистон Республикаси Жисмоний тарбия ва спорт вазирлиги, вилоят жисмоний тарбия ва спорт бошқармалари томонидан жойларда турли спорт тадбирлари ташкил этилмоқда.

Жумладан, Зомин туманида енгил атлетика бўйича югуриш баҳслари ўтказилди. Унда иштирокчилар узоқ масофага югуриш бўйича турли йўналишларда ўзаро беллашдилар. Қашқадарё вилоятининг Шаҳрисабз шаҳрида марафон мусобақаси бўлиб ўтди.

Вилоятнинг Чироқчи туманида жойлашган БЎСМ, шунингдек, туманнинг марказий ўйингоҳида волейбол, футбол ва кураш бўйича мусобақа ниҳоясига етди. Баҳслар якунида фаол спортчилар ташкилотчилар томонидан диплом, медаль ва эсдалик совғалари билан тақдирланишди.

Қайд этиш лозимки, байрамона кайфиятда ташкил қилинган ушбу мусобақалар мамлакатимизнинг минглаб ёшларини бирлаштира олди. Қолаверса, ана шундай спорт тадбирлари аҳоли, хусусан ёшлар ўртасида спортни оммавийлаштиришда муҳим ўрин тутади. Бу эса ўз навбатида спорт ривожига ҳисса қўшиб, мураббийлар учун янги номларни саралаб олишда қўл келади.