Ёшларимизнинг Чирчиқдаги машғулотидан ФОТОРЕПОРТАЖ

Ушбу йиғин 15 февраль куни бошланган бўлиб, 4 мартга қадар давом этади ва шу йил июль ойида Макао давлатида ўтадиган Осиё чемпионатига тайёргарлик босқич вазифасини ўтаб беряпти. 

Терма жамоа бош мураббийи Тоҳир Файзиев Чирчиқ йиғинига жами 65 (35 ўсмир, 30 қиз) нафар дзюдочини таклиф этган. Машғулотлар кунига икки маҳалдан ўтказиляпти.

Бугун Ўзбекистон Миллий олимпия қўмитаси раис ўринбосари, мамлакат дзюдо федерацияси раиси Азизжон Камилов терма жамоамиз машғулотида бўлди.  

Ташриф давомида федерация раҳбари машғулотлар билан бирга у ердаги шароитлар билан ҳам яқиндан танишди.

Меҳмонхона ҳамда машғулот залининг бугунги ҳолатини кўздан кечирди ва бу борада ўз тавсияларини берди.

Таъкидлаш жоиз, ушбу ёш тоифаси терма жамоамизга энг яқин захира ҳисобланади. Париж-2024 Олимпиадаси ва ундан кейин ўтказиладиган халқаро мусобақаларда айнан шу ёшлар Ўзбекистон шарафини ҳимоя қилади.

Шу боисдан ҳам бу ёшларимизга худди катталар терма жамоаси аъзоларига берилаётган эътибор каби муносабатда бўлинмоқда.

Учрашув чоғида МОҚ раиси ўринбосари ёшлар билан суҳбатлашар экан, айни шу жиҳатларга эътибор қаратишларини, ўз устиларида кўпроқ ишлаб, катталар терма жамоаси сафидан тезроқ жой олишга ҳаракат қилмоқликлари лозимлигини таъкиллади.