Юнон-рим курашчиларимиз Олимпиадага қандай тайёрланишмоқда?

Бундан аввалги йиғин Тошкентда, “Динамо” спорт мажмуасида ўтказилган эди. Комил Фаткулин бошчилигидаги мураббийлар штаби асосий эътиборни айнан Ангрендаги йиғинга қаратишни мақсад қилган. Боиси, Олимпиада дастуридан ўрин олган юнон-рум кураши мусобақалари бошланишига роппа-роса бир ой вақт қолди.

Эътиборга молик жиҳати шундаки, терма жамоа спортчилари машғулотлардан ташқари психологик тест ҳам топширишди. Бу эса Рио Олимпиадасига борадиган курашчиларимизнинг мусобақага профессионал ёндашув билан, ҳар томонлама жиддий тайёргарлик кўраётганининг исботидир. Ангрендаги йиғинда Олимпиадага йўл олувчи тўрт нафар юнон-рум курашчимизга терма жамоанинг иккинчи рақамли спортчилари спаринг баҳсларида ёрдам беришади. Машғулотларнинг катта қисми ҳам айнан спаринг баҳсларига ажратилади. Таққослайдиган бўлсак, 2012 йили Лондонда бўлиб ўтган Олимпиадада 2 нафар юнон-рум курашчимиз иштирок этган эди.

Эслатиб ўтамиз, Риодаги Олимпиадада Ўзбекистон шарафини Элмурат Тасмурадов, Мўмин Абдуллаев, Дилшод Турдиев ва Бекзод Абдураҳмонов каби курашчиларимиз ҳимоя қиладилар.