Юнон-рум кураши. Осиё чемпионати. Ассакаловда кумуш, уч нафар спортчимизда бронза

Аввалроқ, бугун баҳсларда иштирок этаётган спортчиларимизнинг барчасида медаллар учун имконият борлиги ҳақида хабар қилгандик.

Осиё чемпионатида медаллар учун баҳслар якунига етди.

-60кг вазн тоифасида гиламга чиққан ҳамюртимиз бронза медали учун баҳсда Хитой Тайпейи вакили Ю Хунг Линни 8:0 ҳисобида мағлубиятга учратди.

-67кг вазнда юртимиз шарафини ҳимоя қилган Мирзобек Раҳматов эса ҳиндистонлик Манишдан 6:4 ҳисобида устун келди ва бронза медали соҳибига айланди.

-72кг вазн тоифасида Осиё чемпионатида иштирок этган Арам Варданян бронза медали учун жангда Юан Жиангга хеч қандай имконият қолдирмади - 9:0!

-97кг вазнда финалгача етиб борган Рустам Ассакалов ҳал қилувчи жангда эронлик Саидганбар Салоҳзодага қарши гиламга чиқди ва 0:4 ҳисобида имкониятни бой берди. Ушбу мағлубият сабаб, спортчимиз кумуш медаль билан кифояланишга мажбур бўлди.

Шу тариқа, юнон-рум курашчиларимиз Осиё чемпионатида 1та олтин, 2та кумуш ва 3та бронза медалини қўлга киритдилар.

Эслатиб ўтамиз, кеча бошланган Осиё чемпионатида юнон-рум курашчиларимиз Елмурат Тасмурадов олтин, Мўминжон Абдуллаев эса кумуш медални қўлга киритганди.