Загреб Гран-приси. Лутфуллаевда қимматли 700 очко, терма жамоамиз эса пешқадамлар сафида!

Кеча эркаклар -60 ва -66 кг, аёллар -48, -52 ҳамда -57 кг вазн тоифаларида медаллар ҳамда Токио-2020 Олимпиадасининг муҳим рейтинг очколари учун татамига чиқишди. 

Қувонарлиси, -60 кг вазнда юртимиз шарафини ҳимоя қилган дзюдочимиз Шарофиддин Лутфуллаев барча рақибларини мағлубиятга учратиб, узоқ кутилган олтин медални терма жамоамиз ҳисобига қўшиб қўйди. У шунингдек, қимматли 700 рейтинг очкосига ҳам эга бўлди. 

-66 кг вазнда ўз имкониятини синовдан ўтказган Муҳриддин Тиловов эса бронза медали учун кечган беллашувда франциялик Килиан де Блоучга учта шидо баҳоси билан ютқазиб қўйди. Ваҳоланки, Муҳриддин украиналик афсонавий дзюдочи Георгий Зантараяни мағлуб этишнинг уддасидан чиққанди. 

Биринчи кунги баҳслардан сўнг Ўзбекистон терма жамоаси битта олтин ва бешинчи ўрин билан умумжамоа ҳисобида кучли учликдан жой олган. Иккинчи ўриндан жой олган Қозоғистон терма жамоаси ҳисобида ҳам худди бизда бўлгани каби битта олтин ва бешинчи ўрин бор. 

Биттадан олтин ва кумуш медалга эга Япония терма жамоаси ҳозирча пешқадам. Канада ва испаниялик дзюдочилар ҳам кечаги кун баҳсларида бир нафардан чемпионга эга бўлишди.