Зоминда ўзбек жанг санъати бўйича мамлакат чемпионати ўтказилди

Миллий урф одатларимиз, қадриятларимиз, ота-боболаримиздан бизгача етиб келган бой маънавий меросимиз ва албатта, ўзига хос ва ўхшаши йўқ жанг усулларини ўзида мужассамлаштирган
Ўзбек жанг санъати бугун ёшларимизнинг севимли спорт турига айланиб бораётганини Зомин тумани мезбонлик қилган мамлакат чемпионатида кўп сонли спортчиларнинг иштирокидан ҳам англаш мумкин.

Спорт вазирлиги ҳамда Республика Ўзбек жанг санъати федерациясининг йиллик тақвим режасидан жой олган мазкур мамлакат чемпионатида 1200 нафар спортчилар "Темурийлар беллашуви", "Қилич-қалқон", "Камондан ўқ узиш" ҳамда "Найза улоқтириш" йўналишларида ўзаро куч синашишди.

Зомин туманининг гўзал табиат қўйнида ўтган мусобақанинг дастлабки кун беллашувларида  700 нафарга яқин ўсмирлар ва ёшлар ҳар бир йўналишда 8 тадан вазн тоифасида  ғолиблик учун кураш олиб боришди. 

Қизиқарли  ўтган учрашувларнинг биринчи кунида энг муносиб деб топилган ёш атлетлар ғолиб ва совриндорлар қаторидан жой олишди.

Регламентга кўра, мусобақанинг иккинчи кунида катталар ўртасидаги "Темурийлар беллашуви", "қилич-қалқон", "камондан ўқ узиш", "найза улоқтириш" "от чоптириш", "от устида камондан ўқ узиш" "от устида қовоқ кесиш" йўналишлари бўйича беллашувлар ҳам муросасиз ва шиддатли тарзда давом этди. Белгиланган ҳар бир йўналишда ғолибликни қўлга киритган спортчилар шоҳ супасига кўтарилиб, диплом ва медаллар билан тақдирланишди.

Чемпионатнинг якуний натижаларига кўра, умумжамоа ҳисобида фахрли биринчи ўринни Тошкент вилояти жамоаси қўлга киритган бўлса, иккинчи ўринни Андижон жамоаси эгаллади. Иккита учинчи ўрин эса Жиззах ва наманганлик атлетларга насиб этди.

Илҳом РАҲМОНОВ тайёрлади