AQSH Senatiga professional boksni UFC modeli asosida isloh qilish bo'yicha qonun loyihasi kiritildi

Ushbu loyiha professional boksni hozirda UFC`da qo'llanilayotgan modelni joriy etish orqali isloh qilishga qaratilgan. Uning tashabbuskorlaridan biri UFC rahbari Dana Uayt hisoblanadi.

Qonun loyihasining asosiy maqsadi "Birlashgan boks tashkilotlari"ni (United Boxing Organizations — UBO) yaratishdan iborat. Ular jangchilar bilan eksklyuziv shartnomalar imzolash, reytinglarni mustaqil yuritish va o'z chempionlik unvonlarini o'ynash huquqiga ega bo'ladilar. Mualliflarning fikricha, bunday yondashuv hozirda chempionlik unvonlari va reytinglarning tarqoq tizimi tufayli qiyinlashgan yirik janglarni tashkil etishni rag'batlantiradi.

Loyiha mualliflaridan biri, respublikachi senator Ted Kruz shunday dedi: "Yigirmanchi asrda boks bizga butun mamlakatni hayajonga solgan mashhur shaxslar va chempionlik janglarini taqdim etgan... Ammo bugungi kunda juda ko'p yirik janglar o'tkazilmay qolmoqda, chunki sport tarqoq tizim garoviga aylangan. Bu qonun shov-shuvli janglarni qaytaradi va boksni yana buyuk qiladi".

Ushbu qonun loyihasining birinchi versiyasi avvalroq Kongressda tinglovlardan o'tgan edi, biroq Senat varianti undan bir qator farqlarga ega. Xususan, endilikda bokschining UBO bilan tuzadigan birinchi shartnomasi uch yildan ortiq muddatga bo'lishi mumkin emas. SHuningdek, Senat versiyasi UBO`ga boshqa sankciyalovchi tashkilotlarning unvonlari va reytinglarini tan olishga ruxsat beradi hamda vazn toifasida bitta unvon bilan cheklanish qoidasini bekor qiladi.

Avvalroq professional bokschi va Muhammad Alining nabirasi Niko Ali Uolsh qonun loyihasiga qarshi ochiq chiqish qilgan edi. "Ali qonuni oddiy tamoyilga asoslangan edi, — dedi u tinglovlarda. — Jangchilarni nazorat qiluvchi shaxslar shu jangchilar bog'liq bo'lgan butun bozorni ham nazorat qilmasliklari kerak. Manfaatlar to'qnashuvi va ekspluataciyaning oldini olish uchun ajratish mavjud. Yangi qonun bir subektga promouter, menejer va tashkilotchi sifatida ishlashga ruxsat berib, bu tamoyilni barbod qiladi. Bu mustaqillikni yo'q qiladi".

Endilikda qonun loyihasi bir necha bosqichli kelishuv va tuzatishlar kiritish jarayonidan o'tishi kerak (bu yanvarm oyi boshigacha amalga oshirilishi lozim). Agar Senat yakuniy versiya uchun ovoz bersa, u imzolash uchun prezident Trampga yuboriladi. Qonun imzolanganidan 180 kun o'tgach kuchga kiradi.