Bosh vazir o'rinbosari poytaxtimizda veloyo'laklar barpo etish yuzasidan masullarga topshiriqlar berdi

Jumladan, aholini jismoniy tarbiya va sportga keng jalb etish maqsadida ommaviy sport tadbirlari muntazam o'tkazib kelinmoqda. Bu esa ayniqsa katta yoshli insonlarda qon aylanishining yaxshilanishi, pirovardida ularning salomatligi mustahkamlanishi va kelajakka bo'lgan ishonchini yanada ortishiga xizmat qiladi.

Hozirda keng jamoatchilik muhokamasiga qo'yilgan «Sog'lom turmush tarzini hayotga keng tatbiq etish va ommaviy sportni yanada rivojlantirish chora-tadbirlari to'g'risida»gi Prezident qarori loyihasi ham shu yo'ldagi say-harakatlarning mantiqiy davomi, deyish mumkin.

O'zbekiston fuqarolarining salomatligini mustahkamlash yo'lida qilinayotgan ezgu ishlardan yana biri – shahar ko'chalarida piyoda yurish hamda velosipedda harakatlanish uchun maxsus yo'lakchalarning yaratilayotganligidir. Bu jihatga ayni paytda keng jamoatchilik tomonidan qizg'in muhokama qilinayotgan Prezident qarori loyihasida ham alohida to'xtalib o'tilgan.

Kecha O'zbekiston Respublikasi Bosh vazirining o'rinbosari A.Abduhakimov bu borada poytaxtimizda olib borilayotgan ishlar bilan tanishdi. Bosh vazir o'rinbosariga Jismoniy tarbiya va sport vaziri o'rinbosari A.Karimov va boshqa mutasaddilar hamrohlik qilishdi.

Dastlab Aziz Abduqahhorovich bu borada poytaxtimizning Mirzo Ulug'bek tumanida yaratilgan shart-sharoitlar bilan yaqindan tanishish maqsadida mutasaddilar hamrohligida velosipedda tumanda amalga oshirilayotgan ishlarni ko'zdan kechirdi. O'rganishlar davomida masullarga tegishli topshiriqlar berildi.

– Mirzo Ulug'bek tumanida tashkil etilgan piyoda yurish va velo yo'lakchalar tajriba sifatida joriy etilmoqda. Bundan tashqari bu ezgu ishlar Yunusobod tumanida ham davom ettiriladi va asta-sekinlik bilan respublikamizning barcha hududlarida yo'lga qo'yiladi. Bu ishlarni amalga oshirishda xalqaro ekspertlarni ham jalb qilgan holda veloyo'lak hamda piyodalar yurishi uchun mo'ljallangan yo'laklar foydalanishga topshiriladi. Bu qilinayotgan ishlar shahrimiz aholisi va chet el fuqarolariga ham ancha qulayliklar yaratadi. Eng asosiysi, poytaxtimiz aholisi va mehmonlarga sport bilan shug'ullanishi, jismoniy tarbiyaga oshno bo'lishlariga imkoniyat va zamin yaratib beriladi. Hozirgi paytda keng jamoatchilik tomonidan qizg'in muhokama qilinayotgan ommaviy sportni rivojlantirishga qaratilgan yangi qaror loyihasiga ko'ra muntazam piyoda yurganlarga imtiyoz sifatida moliyaviy mablag'lar berilishi ham ko'zda tutilgan. Yani, bir sutkada kamida 10 000 qadam va undan ko'p piyoda yurgan insonlarning «Sog'lom turmush tarzi» platformasidagi elektron hamyoniga 3 000 so'm miqdorida o'tkazib beriladi. Tabiiyki, bu barchani ko'proq piyoda yurishga undaydi, degan umiddamiz, - dedi Aziz Abduhakimov.

SHundan so'ng O'zbekiston Respublikasi Bosh vazirining o'rinbosari A.Abduhakimov Toshkentning yana bir tumani Sergeliga ham tashrif buyurdi. Dastlab Sergeli tumanidagi bolalar-o'smirlar sport maktabida bo'lib, bu erda yoshlar uchun yaratilgan sharoitlar hamda kelgusi rejalar bilan tanishdi.

SHuningdek, Sergeli tumanini mamlakatimizda jismoniy tarbiya va ommaviy sportni rivojlantirish bo'yicha namunaviy hududga aylantirish yuzasidan topshiriqlar berdi.

SHuni alohida takidlash kerak, yurtimiz aholisi orasida jismoniy tarbiya va ommaviy sportni rivojlantirish koncepciyasiga muvofiq, mamlakatimizning Qo'qon shahri, Sergeli, Nurota hamda Amudaryo tumanlari namunaviy hududga aylantiriladi va bu erda joriy etilgan sog'lomlashtirish tajribasi keyinchalik butun respublikamiz bo'ylab keng joriy etiladi.