Davron Fayziev: "Daraja nuqtai nazaridan SHahram ancha ilgarilab ketgan"

Fayziev ushbu jangda G'iyosovning imkoniyatlarini yuqori baholadi.  

"Daraja nuqtai nazaridan SHahram Arslanbekdan ancha ilgarilab ketgan. Hozir G'iyosov yaxshiroq bo'lsa kerak. Faqat bitta narsa bor, oldingi mag'lubiyatidan qolgan ruhiy bo'shliq koncentraciyaga salbiy tasir qilmasa, aksincha, revansh kayfiyatida ringga chiqib, bu bo'shliqni kuchga yo'naltirsa, muammoga duch kelmaydi deb o'ylayman. SHahramni jangini anchadan buyon ko'rmadim, oxirgi janglaridan xulosa qiladigan bo'lsak, ayni paytda u ajoyib formada.

O'zi havaskor boksda 3 tagina raund bor. Ayniqsa, engil vazn toifalarida tezlik muhim rol o'ynaydi. O'sha qisqa muddat ichida maksimal tezlikni ishga solib zarbalar berish, aqlli boks, tajriba va taktikalarni qo'llashga ulgurmay qolishyapti. SHuning uchun 30 yoshli kubaliklar mag'lub bo'lyapti. Ular taktika qiladi, dastlabki raundda raqibi bilan o'yin qiladi, ahmoq qilmoqchi bo'ladiyu, natijada o'zi vaqtdan yutqazib qo'ymoqda. Havaskor boksda yosh juda muhim rol o'ynaydi. 27 yosh normal hisoblanadi. Bu yoshdan o'tib ketib qolsa tezlik etmay qolyapti. Raqiblarga etibor beradigan bo'lsak, yosh, titullarga ega bo'lmagan bokschilar. Lekin yoshligi, tezligi evaziga ochkolarni yig'ib tashlayapti. Kattalar jangga moslashgunicha, yoshlar birinchi raundni yutib qo'ymoqda.

Masalan menga qura yoqmadi. Qura ham chempionatning qiziqarli o'tishiga tasir ko'rsatadi. To'g'risi, qurani ko'rmadim, savatlarga ajratilishi lozim. Kuchli bokschilarning avval boshidanoq bir-biri bilan tushib qolmasligi uchun sharoit yaratib berish kerak", - dedi Davron Fayziev.