"Devis kubogi". O'zbekiston terma jamoasining keyingi raqibi malum bo'ldi. O'yinlar yana Toshkentda bo'ladi!

Yodingizda bo'lsa, O'zbekiston terma jamoasi sentyabr oyida II Jahon guruhi doirasida Estoniyani qabul qilib, 3:1 hisobida g'alaba qozongan edi.

Mazkur g'alaba orqali I Jahon guruhi uchun pley off bosqichiga yo'l olgan terma jamoamizning keyingi raqibi nomi malum bo'ldi. Unga ko'ra, Sergey Lebed shogirdlari pley off bosqichida Bosniya va Gercegovina terma jamoasiga qarshi bahs olib boradi.

O'yinlar 2025 yilning fevral oyida Toshkentda o'tkaziladi. Hozircha turnirga qaysi majmua va qanday turdagi kortlar mezbonlik qilishi nomalum.

Jamoalar shu kungacha o'zaro o'yin o'tkazmagan. Bosniya va Gercegovina terma jamoasi so'nggi o'yinini I Jahon guruhi doirasida sentyabr oyida Xitoy Taypeyiga qarshi o'tkazib, 3:2 hisobida imkoniyatni boy bergan edi.

Malumot uchun, O'zbekiston terma jamoasi "Devis kubogi" reytingida ayni damda 287,5 ochkoga ega bo'lgan holda 42-o'rinni egallab turibdi. Bosniya va Gercegovina esa reytingda 30-o'ringa joylashgan.