06 iyu 16:21
Yangiliklar
Jasur Mirzamuhammedov: "ONE FC'da birinchi o'zbek bo'lganim uchun..." +VIDEO
ONE FC'dagi ilk o'zbek Jasur Mirzamuhammedov debyut jangi va yaqin oradagi rejalari bilan o'rtoqlashdi.
"Promoushendagi birinchi o'zbekistonlik bo'lganim uchun sal hayajon bilindi. SHu sababli ham birinchi raundda imkoniyatni boy berib qo'ydim. Keyingi raundda Vatanim, xalqim, oilam uchun jang qilishim kerakligini yanada tushunib etdim va shundan so'ng yanada kuchliroq harakat qila boshladim", - dedi Mirzamuhammedov.
- Aslida 20 mayda oktagonga ko'tarilishingiz lozim edi, ammo jang sananasi o'zgardi. Bu sizlarning tayyorgarligingizga qiyinchilik tug'dirmadimi?
- Viza bilan muammo bo'lgani sababli jangim qoldirildi. ONE FC bizga vaqtida viza qilib bera olmadi. Ularning ayblari bilan jangim qoldirildi. SHu sababli, tezda navbatdagi jangni berishdi. Men jang uchun to'liq tayyor edim.
- Mahmud Muradovning burchagingizda bo'lgani sizga qanchalik yordam berdi?
- Mahmud Muradovga katta rahmat aytaman. Ular o'quv-mashg'ulot yig'inlarida ham menga katta yordam berishdi. Ularni hatto parter holatimda ham eshitaman, har bir vaziyatda aytganlarini oktagonda bajarishga harakat qilaman.
- Jangingizdan ko'nglingiz to'ldimi?
- Juda ham to'ldi demagan bo'lardim. Biroq u erda eng kuchli jangchilar harakat qiladi. Raqibim ham jiu-jitsu bo'yicha jahon chempioni edi.
- Keyingi jangingiz haqida nima deya olasiz?
- Navbatdagi jangimni 3-4 oydan so'ng o'tkazishim aniq. Yaqin o'n kun oila davrasida dam olaman, keyin navbatdagi jangga tayyorgarlik ko'raman. Murabbiyim Jasur Alijonov bilan xorijga tayyorgarlik ko'rish uchun uchib ketamiz.
- Birinchi g'alabangizni kimga bag'ishlaysiz?
- Albatta ota-onamga bag'ishlayman! Ular meni voyaga etkazishdi. Ular men uchun hamma narsani qilishdi.
Fikrlar