Kriket bo'yicha "Mustaqillik Kubogi": "ANFA" chempion!

O'zbekiston Kriket federaciyasi tomonidan mazkur sport turini ommalashtirish, uning moddiy-texnik bazasini mustahkamlash, yoshlar o'rtasida kriketga qiziqishni oshirish hamda iqtidorli sportchilarni erta aniqlash borasida izchil ishlar amalga oshirilmoqda.

Jumladan, yoshlar o'rtasida kriketni keng targ'ib qilish, istedodli sportchilarni saralab olish va ularni klublar hamda milliy terma jamoalar tarkibiga jalb etishga alohida etibor qaratilmoqda.

Ana shunday say-harakatlar samarasi o'laroq, Toshkent viloyatining Qibray tumanida joylashgan "ANFA" xalqaro kriket stadionida O'zbekiston Respublikasi mustaqilligining 35 yilligi munosabati bilan klublar o'rtasida "Mustaqillik kubogi" turniri tashkil etildi.

Turnirda ishtirok etgan jamoalar kun davomida qizg'in va murosasiz bellashuvlarda o'zaro kuch sinashdi. Musobaqaning hal qiluvchi bahsida Toshkent shahrining "ANFA" hamda "O‘zbekiston Stars" jamoalari finalda maydonga tushdi.

Yakuniy natijalarga ko'ra, raqibidan ustun kelgan "ANFA" jamoasi musobaqada birinchi o'rinni egallab, "Mustaqillik kubogi" sohibi bo'ldi.

Turnir doirasida musobaqaning tantanali ochilish marosimi hamda g'olib va sovrindorlarni taqdirlash tadbiri ham tashkil etildi. Unda O'zbekiston Kriket federaciyasi raisi Aziz Mixliev ishtirok etib, musobaqa ishtirokchilarini qutladi va kriket sport turini mamlakatimizda yanada rivojlantirish borasida amalga oshirilayotgan ishlar xususida fikr bildirdi.

"Mustaqillik kubogi" turniri nafaqat klublar o'rtasidagi raqobatni kuchaytirish, balki yosh va iqtidorli kriketchilarni qo'llab-quvvatlash, ularning sport mahoratini oshirish hamda mamlakatimizda kriketning ommaviyligini yanada yuksaltirishga xizmat qilishi bilan ahamiyatli bo'ldi.

Ilhom RAHMONOV tayyorladi