Murodjon Ahmadaliev jangga tayyorgarlik va raqibi haqida nimalar dedi?

Xabaringiz bor, turnir kardidan hamyurtimiz Murodjon Ahmadaliev ishtirokidagi jang ham o'rin olgan. Ikki yo'nalishda sobiq jahon chempioni o'z kamarlarini qaytarib olish uchun ilk qadamini tashlaydi. Ahmadaliev davogarlar jangida meksikalik Kevin Gonsalesga qarshi ringga ko'tariladi. 

CHarm qo'lqop ustamiz kecha bir nechta media tadbirlar, xususan face to face, matbuot anjumanida ishtirok etdi. Bugun bokschilar tarozidan o'tishadi. Biz yakshanba tongidan o'rin olgan muhim jang oldidan charm qo'lqop ustamiz bilan bog'lanib, tayyorgarlik haqida so'radik. 

"Albatta, meni faoliyatimdagi muhim janglardan biri kutib turganini his etib turibman. Eliminator jangi g'olibi chempionlik kamari uchun ringga chiqish huquqini qo'lga kiritadi. Tayyorgarlik ham shunga monand tarzda bo'ldi. To'g'ri, mashg'ulot jarayonida yonimda SHahram G'iyosov, Bahodir Jalolov, Bektemir Meliqo'ziev, Isroil Madrimov, Elnur Abduraimov kabi do'stlarim to'liq bo'lishmadi. Lekin ular bilan har kuni gaplashib turdik. Murabbiylarim bilan birgalikda reja asosida tayyorgarlik ko'rdik. Raqib meksikalikligining o'zi ko'p narsadan darak beradi. Meksikaliklar zarbalarga chidamli bo'lishadi. Ammo menga hozir raqibning farqi yo'q. CHempionlik kamarlarini qaytarib olish uchun astoydil kirishganman. Bu yo'lda birinchi navbatda Gonsalesni mag'lub etishim kerak. Xalqimiz duo qilib turishsa, hammasi yaxshi bo'ladi. Ularni xursand etish uchun borimni beraman", - dedi Ahmadaliev.

Eslatib o'tamiz, ushbu jang WBA kamari uchun Eliminator, yani saralash vazifasini o'tab beradi.