Ngannuning PFL debyut jangidagi ehtimoliy raqibi malum

Kamerunlik aralash yakkakurash ustasining raqibi katta ehtimol bilan amerikalik bokschi, sobiq jahon chempioni Deontey Uaylder bo'ladi. Bu haqda PFL asoschisi Don Devis xabar berdi.

"Men shaffof bo'lish tarafdoriman. Ochig'i, Ngannuning qachon debyut qilishini biz bilmaymiz. Lekin shunisi aniqki, u 2024 yilda PFL bayrog'i ostida yuz foiz kafolati bilan jang o'tkazadi. Bilishimcha, bu jang aralash yakkakurash qoidalari asosida bo'lib o'tadi. Uning raqibi katta ehtimol bilan Deontey Uaylder bo'ladi. Uaylderning o'zi ham bu jangni istayapti. Bu boks va MMA olami uchun katta yangilik bo'lar edi. Bu jang turganida, ikkinchi va uchinchi variantlar haqida o'ylash mantiqsizlik", — dedi Devis MMA Hour nashriga bergan intervyusida.

Eslatib o'tamiz, Deontey Uaylder faoliyatida hech qachon aralash yakkakurash usulida jang o'tkazmagan. Uning boksdagi professional rekordi 43 g'alaba, 1 durang va 2 mag'lubiyatni tashkil etadi. Uaylder 23 dekabr kuni Saudiya Arabistonining Ar-Riyod shahrida Jozef Parkerga qarshi ringga ko'tariladi.