O'zbekistonda 38 yilllik tarixga ega bo'lgan tennis musobaqasi haqida

Bundan bir necha kun oldin poytaxtimizdagi Respublika Olimpiya zaxiralari tennis maktabida o'smirlar o'rtasida "Grade-2" musobaqasi 38-marotaba o'tkazildi. Ushbu turnir o'smirlar o'rtasida tennis bo'yicha O'zbekistondagi eng obro'li va eng ko'p reyting ochkolarini beruvchi musobaqa hamdir. 18 yoshgacha bo'lgan yosh tennischilarimiz uchun mazkur turnir doimo o'ziga xos tajriba maktabini o'tab kelgan. Deyarli har bir o'zbek  tennischisi o'smirlik davrida ushbu musobaqada ishtirok etgan.
Tarixga nazar tashlaydigan bo'lsak, ushbu musobaqa 1999 yilgacha G-5, 2002 yilgacha G-4, keyin G-3 mavqeiga ega bo'lgan. 2012 yildan boshlab esa G-2 darajasigacha ko'tarildi. Bu turnirda hatto o'z vaqtida jahonning birinchi raketkasi bo'lgan Marat Safin xam ishtirok etgan.

Hamyurtlarimizdan qizlar o'rtasidagi bahslarda o'z vaqtida Iroda To'laganova, Albina Xabibullina, Sabina SHaripovalar bu musobaqada bosh sovringa ega chiqqanlar. Erkaklar o'rtasidagi bahslarda esa Denis Istomin, Temur Ismoilov(2marta), Jo'rabek Karimov (2marta) g'olib bo'lgan.

Bu musobaqa turli yillarda mart, aprel va may oylarida o'tkazilgan. Faqatgina, so'ngi yillarga kelib mart oyining o'rtalarida tashkil qilinmoqda. Har yili o'smirlar reytingida "Top-100"ga kiruvchi bir qator tennischilar ushbu musobaqada ishtirok etish istagini bildirishadi. Bu yilgi bellashuvlar ham bundan mustasno emas. Vakillarimizdan 2001 yilda tug'ilgan Sergey Fomin musobaqa boshlanishidan oldin o'smirlar reytingida 88-o'rinda borardi. Ushbu turnirda yosh sportchimiz to'rtinchi raqamda saralandi va musobaqa finaliga qadar etib bordi. Bu yo'lda u hatto turnirning birinchi raqamli tennischisini xam mag'lub eta oldi. Afsuski, bosh mukofot uchun belgiyalik Boviy Arnaudga qarshi kechgan bahsda u  3/6, 3/6 hisoblarida yutqazib qo'ydi. SHu tariqa, Fomin o'smirlar reytingida 75, raqib esa 100 ochkoga ega bo'ldi.

Turnirdan so'ng Sergey Fomin 19 pog'ona yuqoriladi va hozirda 69-o'ringa ko'tarilgan. Vakillarimizdan shuningdek, Temur Sottimov ikkinchi davragacha etib bordi. Qizlarimiz esa turnirda biroz omadsiz qatnashishda. Yasmina Karimjonova va Olesya Kim ikkinchi davrada mag'lubiyatga uchradi. Vaholanki, musobaqada hamyurtlarimizdan o'g'il bolalar va qizlar o'rtasidagi bahslarda etti nafardan tennischi ishtirok etgandi.

O'ylaymizki, kelajakda ushbu musobaqa mavqei yanada ko'tariladi va hali uzoq vaqt o'smir tennischilarimizning tajriba orttirishida, o'sishida o'z hissasini qo'shib boradi. Biz ushbu musobaqa ishtirokchilari va tashkilotchilariga ulkan zafarlar tilab qolamiz!

Husniddin Mirzaliev