PFL ligasi rasman Bellator promoushenini sotib oldi

Bu haqda Financial Times nashriga bergan intervyusida PFL asoschisi Donn Devis xabar berdi. Devisning so'zlariga qaraganda, Bellator promoushenining shu paytgacha egasi bo'lib kelgan Paramount Global kompaniyasi ham tashkilotda kichik ulushga ega bo'lib qoladi. Bellator jangchilari bir vaqtning o'zida PFL oktagonida, o'z o'rnida PFL aralash yakkakurash ustalari Bellator`da jang qilishlari mumkin bo'ladi. 

Bundan tashqari, 2024 yilda PFL va Bellator hamkorlikda turnir o'tkazadi. Unda ikki promoushen chempionlari o'zaro oktagonda to'qnash keladi. PFL rahbarlari UFC promoushenini industriyada yakka hokimlik maqomidan olib tashlash istagida ekanliklarini yashirishmayati. 

"Bizning bu yurishimiz MMA landshaftini to'laligicha o'zgartiradi. MMA olamidagi ikkita ikkinchi raqamlilar birlashdi. Bu katta kuch. PFL va Bellator qo'shma rosteridagi 30 foiz jangchilar Fight Matrix versiyasi bo'yicha jahonning Top-25 jangchilari qatoriga kiradi", - dedi Devis.

Bellator MMA rasmiylari ham ushbu savdoning rasman amalga oshganini tasdiqlashdi. 

"Biz PFL oilasi bilan birlashdik", - deyiladi tashkilotning ijtimoiy tarmoqdagi sahifalarida.

SHanba oqshomida Bellator MMA ligasi CHikagoda Bellator 301 turnirini o'tkazdi. Ayni paytda tashkilotning rasmiy taqvimida rejalashtirilgan hech qanday turnir yo'q. PFL ligasi esa 24 noyabr kuni mavsumning final turnirini o'tkazadi. Unda 2023 yilgi mavsum chempionlari aniqlanadi.