Rasman. Isroil Madrimovning jangi Toshkentda o'tkaziladi

Avval xabar berganimizdek, Isroil «The Dream» Madrimovning dekabr oyida franciyalik Mishel Soroga qarshi o'tkaziladigan jangiga Toshkent shahri mezbonlik qilishi mumkin edi. Bu xabar rasman o'z tasdig'ini topdi. Avvaliga Isroil, keyin esa taniqli promouter Eddi Xirn bu malumotni tasdiqladi.  

Madrimov - Soro jangi g'olibi WBA chempionlik jangida ringga chiqish uchun rasmiy davogarga aylanadi. "Mir Boksa" kompaniyasi "Matchroom Boxing" bilan hamkorlikda ushbu jangni 11 dekabr kuni Toshkentda o'tkazadi. Poytaxtimizdan tashqari jang mezbonligiga AQSHning Las-Vegas va Klivlend shaharlari ham davogarlik qilgandi. 

Aukcion g'olibi tomonidan taqdim etilgan mukofot jamg'armasi 245 ming dollarni tashkil etgan. Reytingning birinchi raqamli bokschisi Mishel Soro mukofot pulining 60 foizi - 147 ming dollar, reytingning ikkinchi raqamli bokschisi Isroil Madrimov esa 40 foiz - 98 ming dollarga ega bo'ladi.