Rasman! Yubiley UFC 300 turnirining sanasi va manzili tasdiqlandi

Tashkilot tomonidan taqdim etilgan rasmiy press-relizda yubiley UFC 300 turniri 2024 yilning 13 aprel kuni AQSHning Nevada shtati Las-Vegas shahridagi muhtasham T-Mobile arenada o'tkazilishi o'z tasdig'ini topdi.

Hozircha ushbu turnirning hech bir jangi rasman elon qilinmagan. SHunday bo'lsa-da, UFC prezidenti Dana Uayt muxlislar prelim kardning ilk jangidan boshlab zavq ola boshlashlarini kafolatlamoqda.  

SHuningdek, Dana bo'lajak musobaqada liga faxriysi, UFC 100 va UFC 200 turnirlarida oktagonga ko'tarilgan yagona jangchi Jim Millerning ham ishtirok etishini tasdiqladi.

Malumot uchun, 2009 yilda o'tkazilgan UFC 100 turnirining asosiy jangi og'ir vazn toifasi chempionligi uchun Brok Lesnar hamda Frenk Mir o'rtasida tashkil etilgandi. 2016 yilda bo'lib o'tgan UFC 200 turnirining markaziy jangi esa ayollar engil vazn toifasi kamari uchun Amanda Nunes hamda Misha Teyt o'rtasida kechgandi. Aslida o'sha oqshomda MakGregor – Dias 2 va Jons – Korme 2 janglari o'tkazilishi kerak edi. Ammo malum sabablarga ko'ra bu ikki jang bekor bo'lgandi.

Ayrim tasdiqlanmagan xabarlarga ko'ra, UFC 300 turnirining markaziy jangi yarim o'rta vaznda Konor MakGregor hamda Maykl CHendler o'rtasida o'tkazilishi mumkin.