"Uimbldon"ga qura tashlandi. Nigina Abduraimovaning raqibasi malum!

Umumiy mukofot jamg'armasi 44,7 million funt sterlingni (taxminan 52,2 million evro) tashkil etuvchi musobaqaning ayollar o'rtasidagi saralash bahslarida hamyurtimiz Nigina Abduraimova ham o'z imkoniyatini sinab ko'radi. Turnirning mukofot jamg'armasi o'tgan yilgi bilan taqqoslaganda 11,2 foizga oshirilib, musobaqa tarixida rekord darajaga etkazildi.

Qura natijasiga ko'ra mamlakatimizning birinchi raketkasi saralashning birinchi davrasida yaponiyalik Moyuka Uchijimiga qarshi kortga chiqadi. Ayni paytda Abduraimova WTA reytingida 172, Uchijima esa 153-o'rinni egallab turibdi. 

Ushbu juftlik g'olibasi keyingi bosqichda amerikalik tennischilar - Irina Falkoni hamda Sofiya Kenin uchrashuvida zafar quchgan raketka ustasiga qarshi bahs olib boradi. Dunyoning 126-raketkasi bo'lib turgan Kenin 2020 yilgi Avstraliya Ochiq chempionati g'olibasi hisoblanadi. 

Malumot uchun, Nigina Abduraimova - Moyuka Uchijima uchrashuvi bizning vaqt bilan soat 18:00da boshlanishi belgilangan. Bu tennischilarning o'zaro o'tkazadigan beshinchi uchrashuvi bo'ladi. Bungacha barcha qarama-qarshiliklarda Kunchiqar yurt vakilasining qo'li baland kelgan.