35 ёшли Мария финалда, у чемпионлик унвонини ҳимоя қилади

Мусобақанинг амалдаги ғолибаси, германиялик Татьяна Мария қаторасига иккинчи йил ҳам финалда кортга чиқадиган бўлди. Дунёнинг 66-ракеткаси бўлиб турган Мария 1/2 финалда WTA рейтингида 817-поғонада бораётган британиялик Франческа Жонсни 6/3, 6/4 ҳисобларида мағлубиятга учратди.

Бу теннисчиларнинг ўзаро ўтказган илк учрашуви эди. Тўқсон олти дақиқа давом этган баҳсда ҳар икки теннисчи ҳам 2 тадан эйс зарбасини амалга оширишган. Татьяна чемпионлик ҳимоясига айланадиган финал учрашувида америкалик Пейтон Стирнсга қарши кортга чиқади. У 1/2 финалда россиялик Камилла Рахимовадан 3/6, 6/2, 6/2 ҳисобида устун келди.