5 февраль кунги UFC турнирининг марказий жанги маълум

Оғир вазн тоифасида "Қора ваҳший" ва "Қутб айиғи" ўртасида АҚШнинг Лас-Вегас шаҳрида ўтказиладиган жанг UFC Vegas 68 турнирининг марказий баҳсига айланади. Унда молдовалик Сергей Спивак америкалик Деррик Льюисга қарши октагонга кўтарилади. 

Аслида ушбу турнир Жанубий Кореянинг Сеул шаҳрида ўтказилиши ва унинг марказий жангида "Кореялик Зомби" октагонга чиқиши лозим эди. Аммо кореялик аралаш яккакураш устаси жароҳат олганидан сўнг UFC раҳбарлари турнирни Осиёдан яна АҚШга қайтаришди. 

Эслатиб ўтамиз, 37 ёшли Деррик Льюис кетма-кет иккита жангда мағлубиятга учради. Аввалига Тай Туиваса, кейин эса Сергей Павлович Деррикни нокаутга учратди. 27 ёшли Сергей Спивак эса аксинча, муддатидан аввал қўлга киритилган иккита ғалаба билан ушбу жангга етиб келмоқда. Молдовалик спортчи Грег Харди ва Аугусто Сакайни техник нокаутга учратган.

Маълумот учун, Спивак фаолияти давомида 15 ғалаба ва 3 мағлубият қайд этган. Деррик эса 26 ғалаба ва 10 мағлубиятга эга. Айни пайтда Льюис UFC оғир вазн тоифаси рейтингида еттинчи, Спивак эса ўн иккинчи ўринни эгаллаб турибди.