Камару Усман UFC 278 турнирининг марказий жангида октагонга кўтарилади + ПОСТЕР

Нигериялик даҳшат 20 август куни Солт-Лейк-Сити шаҳрида ташкил этиладиган UFC 278 турнирининг марказий жангида рейтингнинг иккинчи поғонасидан жой олиб турган Леон Эдвардсга қарши октагонга чиқади. Чемпионлик жанги расман UFC томонидан эълон қилинди.  

Ушбу жанг 35 ёшли Усман учун олтинчи чемпионлик ҳимоя жанги бўлади. Камару 5 та ҳимоя жангидан 3 тасини ўтган йили ўтказиб, Гилберт Бернс ва Хорхе Масвидални нокаутга учратди, Колби Ковингтонни очколар ҳисобига кўра мағлуб этди.

Унинг рақиби 30 ёшли Леон Эдвардс эса 10 та ғалабадан иборат ажойиб серияни давом эттирмоқда. Сўнгги жангида Нейт Диасни очколар ҳисобига кўра таслим этган эди. Британияликнинг сўнгги мағлубияти 2015 йилга тўғри келади ва эътиборлиси, Леонга ўша мағлубиятни айнан Камару Усман тақдим этганди.