Абдулҳай Шораҳматов проф боксда дебют қилади. Дастлабки жанг манзили, сана ва рақиб маълум

Olamsport.com сайтига маълум бўлишича, Шораҳматов 8 февраль куни профессионал боксда дастлабки жангини ўтказади. 

Ўша куни ҳамюртимиз Филиппинда мезбон боксчи Бенжи Эбидога қарши рингга кўтарилади. Қайд этиш лозимки, Эбидо бунгача проф боксда иккита жанг ўтказган ва уларнинг иккаласида ҳам мағлуб бўлди. 

Абдулҳай эса бунгача фақат ҳаваскор боксда, шунингдек Бутунжаҳон бокс серияси жангларида иштирок этган. WSBда у "Uzbek Tigers" сафида 6 та жанг ўтказган ва уларнинг барчасида ғалаба қозонган.

Маълумот учун, Абдулҳай Шораҳматов Британиянинг "Queensberry Promotions" компанияси билан келишувга эришган. Англиядаги қоидаларга кўра, у ерда профессионал боксдаги дебют жангини ўтказиш мумкин эмас. Шу сабабли ҳам Шораҳматов дебют жангини Британиядан ташқарида ўтказади.

Ушбу жанг оқшоми "Black Cobra" лақаби билан машҳур Деви Купер томонидан ташкил этилмоқда. Таъкидлаш жоизки, у ўзбекистонлик бошқа бир боксчи Санжар Раҳмонов билан бирга ишлайди.