Абдуллаев Жаҳон чемпионатининг финалида, Жўрабоев бронза учун курашади

Бугундан юнон-рум курашчилар медаллар учун баҳсларга киришишди. Классиклар беллашувида юртимиз шарафини тўлиқ таркибдаги курашчиларимиз ҳимоя қилишяпти. Қувонарлиси, 55 кг вазн тоифасидаги ҳамюртимиз Алимардон Абдуллаев финалга етиб келди. 

У нимчорак финалда қирғизистонлик Акйикат Кулжигит уулуни 5-1, чорак финалда руминиялик Денис Флоринни 8-0, ярим финалда тожикистонлик Асламжон Азизовни 8-3 ҳисобида мағлуб этди. Энди у эртага жаҳон чемпионатининг олтин медали учун кечадиган баҳсда эронлик Амирризо Деҳбозоргига қарши гиламга чиқади. 

Яна бир курашчимиз Шаҳриёр Жўрабоев эса жаҳон чемпионатининг бронза медали йўлидаги ўтиш баҳсида иштирок этади. 87 кг вазндаги полвонимизнинг рақиби хорватиялик Кристиан Лукач бўлади. Ушбу жуфтлик ғолиби бронза медали учун кечадиган учрашувда туркиялик Тансел Ортучуга қарши баҳс олиб боради.