Абдураимова дунёнинг 50-ракеткасига фақат битта сет қаршилик кўрсатди

Мукофот жамғармаси 125 минг долларни ташкил этувчи ушбу мусобақада ҳамюртимиз Нигина Абдураимова ҳам муваффақиятли старт олган эди. Афсуски, ҳозиргина якунига етган 1/8 финал учрашувида мамлакатимизнинг биринчи ракеткаси кучли рақибасига ютқазиб қўйди. 

Етмиш дақиқа давом этган баҳсда дунёнинг роппа-роса 50-ракеткаси, турнирда иккинчи рақам остида таснифланган россиялик Анна Блинкова 6/4, 6/0 ҳисобида ғалаба қозониб, чорак финалга йўл олди. Учрашув давомида Нигина 2, Анна 4 та эйс зарбасини амалга оширган.

Таққослаш учун, Нигина Абдураимова WTA рейтингида 221-поғонадан жой олган. Бу теннисчиларнинг ўзаро илк учрашуви бўлди.