Абдураимова иштирокида ўтган финалда мўъжиза рўй бермади

Мукофот жамғармаси 40 000 АҚШ долларини ташкил қилувчи турнирда ҳамюртимиз Нигина Абдураимова ҳам муваффақиятли иштирок этди. Мамлакатимизнинг биринчи ракеткаси ҳозиргина якунига етган финал учрашувида кортга чиқди. 

Афсуски, турнирда иккинчи рақам остида таснифланган Абдураимова мусобақанинг биринчи ракеткаси, WTA рейтингида 71-ўринни эгаллаб турган германиялик Татьяна Марияга 1/6, 1/6 ҳисобида имкониятни бой бериб, Пуна турнири вице-чемпионига айланди. 

Таққослаш учун, Нигина Абдураимова WTA рейтингида 176-поғонадан жой олган. У финалга қадар латвиялик Диана Марцинкевични 6/2, 6/0, россиялик Дарья Кудашовани 6/2, 6/1, япониялик Ери Шимизуни 6/2, 6/1, 1/2 финалда россиялик Валерия Савинихни 6/4, 2/6, 6/4 ҳисобида мағлубиятга учратган эди.