Абдурауф Бозорбоев: "Камчиликлар устида ишлаймиз"

Классикларимиз мусобақанинг биринчи куниёқ 3 та олтин ва 1 та бронза медалини қўлга киритишди. Эркин курашчиларимиздан эса Ғуломжон Абдуллаев кумуш, Бекзод Абдураҳмонов ва Умиджон Жалолов бронза медалига сазовор бўлишди. Биз Истанбулдаги рейтинг турнири якунлари ва олдинда турган мусобақаларга тайёргарлик юзасидан эркин кураш терма жамоамиз катта мураббийи Абдурауф Бозорбоевдан интервью олдик. 

- Абдурауф ака, дастлаб мусобақа таассуротлари билан ўртоқлашсангиз.

- Кучли мусобақа бўлди деб бемалол айта оламан. Ўз номи билан йилнинг дастлабки рейтинг турнири, табиийки, дунёнинг энг кучли курашчилари қимматли рейтинг очколарини тўплаб олиш учун Туркияга келишди. Ҳар бир вазн тоифасида 4-5 нафардан рейтинги юқори курашчилар гиламга чиқди. Улар орасида Олимпиада ва жаҳон чемпионлари кўпчиликни ташкил этди. Бу эса медаллар учун кураш нечоғлик кескин кечганини тасдиқлайди. 

- Эркин курашчиларимизнинг иштироки қониқарли бўлдими?

- Биз Туркиядаги турнирга аралаш таркиб билан бордик. Ёш курашчиларимизда ҳаяжон, халқаро тажрибанинг етишмаслиги сезилиб турди. Қолаверса, йилнинг дастлабки мусобақаси бўлгани учун камчиликлар кўзга ташланиб қолди. Умиджон Жалолов, Бекзод Абдураҳмонов ва Ғуломжон Абдуллаев ўз вазнларидан битта юқори вазнда ўзларини синаб кўришди. Бекзод Токио Олимпиадасидаги вазнидан 12 кг юқори вазнда курашди. Шунга қарамай, уччала курашчимиз ҳам ўзари учун янги вазнда Истанбул рейтинг турнири медалини қўлга киритишди. Умиджонни вазнида дунёнинг энг кучли курашчилари бор эди. У номдор рақибларини мағлубиятга учрата олди. Энди камчиликлар йўқ эмас. Техник-тактик масалаларда ишлашимиз кераклиги ойдинлашди. Хатоларимизни биламиз ва машғулотларда шу камчиликларни бартараф этиш устида ишлаймиз. Яна бир гап, юқорида айтганимдек, бу мавсумнинг биринчи старти бўлди. Шунинг учун, ҳамма ҳар хил спорт формасида келган. 

- Эндиги режалар қандай?

- Туркиядаги мусобақадан сўнг йигитларга 4-5 кун дам бердик. Ҳозир машғулотлар режа асосида давом этмоқда. Апрель ойида бизни Осиё чемпионати кутиб турибди. Асосий эътибор шу мусобақага қаратилган.