Аброр Атабаев Қозоғистондаги рейтинг турнири ғолиби, қолганларда бронза

Бундай тоифадаги турнирлар бир йилда тўртта ўтказилади. Бугунги дастур доирасида юнон-рум кураши бўйича бешта вазн тоифасида ғолиб ва совриндорлар номи маълум бўлди. Равшан Рўзиқулов бош мураббийлигидаги юнон-рум курашчиларимиздан беш нафари кечки дастурда медаллар учун гиламга чиқди. 

Қувонарлиси, 67 кг вазнда юртимиз шарафини ҳимоя қилган Аброр Атабаев барча рақибларини мағлуб этиб, рейтинг турнири ғолибига айланди. У 1/4 финалда қозоғистонлик Султан Ассетулини 9-0, 1/2 финалда эронлик амадаги жаҳон чемпиони Мейсам Далханини, олтин медаль учун кечган баҳсда эса грузиялик Жони Хетсуриани 4-0 ҳисобида енгди. Атабаев шарафини қозоқ заминида Ўзбекистон давлат мадҳияси янгради.  

Эътиборга молик жиҳати, бронза медали учун кечган беллашувларда қолган барча курашчиларимиз зафар қучиб, улар ҳам шоҳсупага кўтарилишди. 60 кг вазн тоифасида бир йўла икки нафар курашчимиз Илҳом Баҳромов ва Муҳаммадқодир Юсупов рўбарў келишди. Ўзига хос ўзбек дербисида Юсупов 2-1 ҳисобида ғалаба қозониб, бронза медали соҳибига айланди. Шунингдек, Жалгасбай Бердимуратов, Рустам Ассакалов ва ярим финалда ҳакамлар қарори қурбонига айланган Жасурбек Ортиқбоев ҳам бронза медалини қўлга киритди. 

Шу тариқа, Ўзбекистон юнон-рум кураши терма жамоаси нуфузли рейтинг турнирининг биринчи куни 1 та олтин, 4 та бронза медалига эга чиқди. Эртага қолган 5 та вазн тоифасида ғолиб ва совриндорлар номи маълум бўлади.  

Медаль учун гиламга чиққан курашчиларимиз:

Олтин медаль учун

67 кг: Аброр Атабаев - Жони Хетсуриани 4-0

Бронза медаль учун 

55 кг: Жасурбек Ортиқбоев - Гиорги Тохадзе (Грузия) 14-5

60 кг: Муҳаммадқодир Юсупов - Илҳом Баҳромов 2-1

87 кг: Жалгасбай Бердимуратов - Нурсултан Турсинов (Қозоғистон) 3-1 

97 кг: Рустам Ассакалов - Умалт Даудов (Қозоғистон) 10-2