“Ал Иттиҳод” уч мавсумдан сўнг Фабиньо билан хайрлашди

“У юлдуз сифатида келиб, камтарлигини сақлаб қолди, жамоани ишонч билан олдинга бошлаб борди ва клубни чин дилдан севиб қолган инсон сифатида кетди”, – дейилади “Ал Иттиҳод” мурожаатида.

Жидда клуби бразилиялик футболчининг меҳнатга бўлган муносабати ва жамоадошларига кўрсатган таъсирини алоҳида эътироф этди. Ярим ҳимоячи майдонда ва ундан ташқарида профессионаллик намунаси деб аталди. Клуб, шунингдек, Фабиньо жамоанинг буюк ғалабалари даврида сардорлик боғичини тақиб тушганини эслатиб ўтди.

Ўз навбатида, бразилиялик футболчи мухлисларга илиқ қабул учун миннатдорлик билдирди ва жамоа шарафини фахр билан ҳимоя қилганини таъкидлади.

Фабиньо Саудия Арабистони клубига 2023 йилнинг ёзида “Ливерпул”дан ўтганди. У 2024/25 йилги мавсумда жамоа билан бирга Саудия Арабистони чемпионати ва Қирол Кубогини қўлга киритди.