Алекс Перейра UFC’да оғир вазнда ўтказиши мумкин бўлган икки жангни айтди

Бразилиялик аралаш яккакураш устаси биринчи галда оғир вазнда собиқ UFC чемпиони Жон Жонс билан жанг қилмоқчи. Кейин эса чемпионлик камари учун октагонга чиқишни режалаштирган. 

"Мен UFC’га Жон Жонс билан Оқ уйда жанг қилишни хоҳлашимни айтдим, шунингдек, оғир вазн тоифасида учинчи камар учун жанг ҳақида ҳам гапирдим. Лекин нима бўлишини билмайман - бу менинг қўлимдан келмайди. Мен ҳам бошқалар каби шунчаки кутяпман", - деди Алекс Бразилиянинг Omelete телеканалига берган интервьюсида.

Жон Жонсга қарши жангнинг ўтказилиши билан боғлиқ муаммо кўринмаяпти. Лекин оғир вазн чемпионлиги учун жанг масаласида қийинчиликлар туғилиши муқаррар. Том Аспиналл ва Сирил Ган ўртасида реванш жанги ўтказилиши, Александр Волков чемпионлик имкониятини кутаётганини ҳисобга олсак, бу борада кўплаб саволлар юзага келади.

Ган ва Перейра вақтинчалик чемпионлик камари учун жанг ўтказадиган бўлса, вазият ижобий томонга ўзгариши мумкин. Бу ҳолатда Волковни ташкилот раҳбарияти чемпионлик жангида кўришни унчалик хоҳламайдиган ҳамюртлари Арман Царукян ва Мовсар Евлоев тақдири кутмоқда.

Эслатиб ўтамиз, Алекс Перейра октябрь ойида ярим оғир вазн тоифасининг эндиликда собиқ чемпиони Магомед Анкалаевни биринчи раунддаёқ техник нокаутга учратиб, ўз камарини қайтариб олганди.