Алькарас - финали 23 дақиқа давом этган "Мастерс" турнири чемпиони!

ATP рейтингида иккинчи ўринни эгаллаб турган испаниялик теннисчи ҳал қилувчи финал учрашувида дунёнинг биринчи ракеткаси, италиялик Янник Синнерга қарши кортга чиқди. Баҳс кутилмаганда биринчи сетнинг бешинчи геймидан кейин тўхтатилди. Синнер ўзини ёмон ҳис қилиши натижасида учрашувда давом эттира олмади. Бу пайтга келиб Карлос 5:0 ҳисобида олдинда бораётганди.   

Теннисчилар кортда бор йўғи 23 дақиқа ҳаракат қилишган. Икки ракетка устасининг ўзаро учрашувларида Алькарас катта устунлик билан олдинда бормоқда - 10:5. Бу 22 ёшли Карлос Алькарас учун ATP турнирларидаги 22-соврин бўлди. Совринлардан 8 таси "Мастерс" турнирларида қўлга киритилган.

ATP Masters 1000 турнирининг мукофот жамғармаси 9 миллион 193 минг 540 АҚШ долларини ташкил этди. Чемпион Карлос Алькарас 1 миллион 124 минг 380, финалчи Янник Синнер эса 597 минг 890 долларга эга бўлди. Испаниялик теннисчи сўнгги 7 та ўзаро учрашувларнинг 6 тасида Янникни мағлуб этган. 

Шунингдек, у Синнернинг хард кортлардаги 26 та учрашувдан иборат ғалабали сериясига ҳам барҳам берди. Италиялик охирги мағлубиятини ўтган йилнинг октябрь ойида Пекин турнирининг финалида айнан Карлосдан қабул қилиб олган эди.