Ана холос! Топурия ўзини UFC юлдузи даражасига олиб чиққан жамоаси билан хайрлашди

Лекин Чарльз Оливейрага қарши кечадиган ушбу жангда Илияни шу даражага олиб чиққан мураббийлари бўлмайди. Marca нашри берган хабарга қараганда, Топурия ўз мураббийлари Хорхе ва Аугусто Климента билан хайрлашган. Унинг бу қарорини Илиянинг акаси Александр Топурия ҳам қўллаб-қувватлаган.

Томонлар яхши йўл билан хайрлашишган. Бундай қарорга келинишига Илия ва мураббийлар яшаш ҳудудлари орасидаги катта масофа сабаб бўлгани айтилмоқда.   

"Улар бошқа-бошқа шаҳарларда яшайдилар. Бу эса ҳамиша кўнгилдагидек ишлаш учун тўсқинлик қилиб келмоқда", – дея Топуриянинг жамоасидагилар сўзларини келтирмоқда Marca. 

Маълумот учун, ака-ука Климентлар Испаниянинг Аликанте шаҳридаги "Climent Club" машғулот базасининг эгалари ҳисобланади. Айнан шу залда Топурия 15 ёшидан машғулотларни бошлаган ва ҳозиргача жангларига шу ерда тайёргарлик кўриб келган. 

"Ўтган йиллардаги ҳамкорлик ва шу даражага чиқишимда ёрдам берганликлари учун мураббийларга раҳмат айтаман. Уларнинг келгуси лойиҳаларида омад тилайман", – деди Илия Топурия. 

Ҳозирча Топуриянинг янги мураббийлар штаби эълон қилинмаган. Лекин унинг бокс бўйича мураббийи Хави Климент ҳамкорликни давом эттиради. Шунингдек, жисмоний тайёргарлик бўйича мутахассис доктор Альдо ҳам жамоада қолади.