Анвар Анваров Швециядаги турнир чемпиони!

Жаҳон енгил атлетика ташкилотининг Continental Tour сериясига кирувчи ва Бронза даражасига эга ушбу мусобақада мезбон спортчилар билан бир қаторда Европанинг етакчи атлетлари ҳамда халқаро майдондаги кучли енгил атлетикачилар иштирок этди.

Ҳамюртимиз Анвар Анваров эркаклар ўртасида узунликка сакраш баҳсларида қатнашиб, барча рақибларидан устун келди. Мамлакат рекордчиси иккинчи уринишда 8.23 метр натижа қайд этиб, мусобақа якунига қадар сақланиб қолган энг яхши кўрсаткич эгасига айланди ва олтин медални қўлга киритди.

Шамол тезлиги рухсат этилган меъёрдан юқори — +3,0 м/с бўлгани сабабли ушбу натижа Анваровнинг мавсумдаги энг яхши натижаси сифатида расман қайд этилмайди.

1-ўрин. Анвар Анваров — 8.23 метр

2-ўрин. Хенрик Флотнес — 8.03 метр

3-ўрин. Кристоф Папп — 7.79 метр.