АҚШ хоккей терма жамоаси 65 йилдан кейин яна Жаҳон чемпионати шоҳсупасида

Мусобақанинг финал учрашувида АҚШ терма жамоаси Швейцарияга қарши музга чиқиб, Тейж Томпсоннинг овертаймда киритган шайбаси эвазига ғалаба қозонди.

Бу америкаликларнинг 65 йиллик танаффусдан кейин қўлга киритган илк Жаҳон чемпионлигига айланди. Швейцария терма жамоаси эса кетма-кет иккинчи маротаба элита дивизион финалида мағлуб бўлди.

Қайд этиш жоиз, АҚШ термаси мусобақада энг ёш таркиб билан қатнашди. Уларнинг таркибида тўрт нафар университет талабалари ҳам мавжуд эди. Финал ўйини Швейцария сардори Андреас Амбюль учун фаолиятидаги сўнгги ўйин бўлди. Амбюль Жаҳон чемпионатларининг рекордчиси ҳисобланади. У фаолияти давомида жами 20 та дунё биринчилигида иштирок этиб, 151 та ўйинда музга чиққан.

Учинчи ўрин учун кечган беллашувда Швеция Данияни 6:2 ҳисобида ишончли тарзда енгди.

Жаҳон чемпионати-2025нинг якуний турнир жадвали: 

1. АҚШ

2. Швейцария

3. Швеция

4. Дания

5. Канада

6. Чехия

7. Финляндия

8. Австрия

9. Германия

10. Латвия

11. Словакия

12. Норвегия

13. Словения

14. Венгрия

15. Қозоғистон

16. Франция.

Кейинги Жаҳон чемпионатининг элит дивизион баҳслари энди 2026 йилнинг 15-31 май кунлари Швейцарияда бўлиб ўтади. Қуйига тушган Қозоғистон ва Франциянинг ўрнини турнирда Италия ва Буюк Британия терма жамоалари эгаллайди.