Ар-Риёддаги UFC турнири кардига яна бир жанг қўшилди

Мағлубият нималигини билмай келаётган россиялик аралаш яккакураш устаси Магомед Гаджиясулов ҳам ушбу турнирда жанг қиладиган бўлди. Яримоғир вазн тоифасидаги Магомед UFC Fight Night оқшомида бразилиялик Брендсон Рибейрога қарши октагонга чиқади. 

Гаджиясулов 8 та ғалабали серия билан келмоқда. Магомед фаолияти давомида Brave FC ва Eagle FC промоушенларида ўз жангларини ўтказган. У Dana White Contender Series 2023 турнирида Хосе Мединани мағлубиятга учратганидан кейин UFC промоушени билан шартнома имзолаганди. 

Брендсон Рибейро эса 13 ғалаба ва 6 мағлубият қайд этган. У ҳам UFC лигасига Dana White Contender Series турниридаги ғалабасидан сўнг таклиф этилган. Ўшанда у Бруно Лопесни биринчи раунднинг иккинчи дақиқасидаёқ нокаутга учратган эди. Лекин унинг кучли лигадаги дебюти омадсиз чиққанди. Рибейро UFC 298 турнири доирасидаги жангнинг биринчи раундида Жанг Мингианг томонидан нокаутга учратилганди.