Аргентина ва Албания ирқчилик туфайли 6 хонали рақамдан иборат жаримага тортилди

ФИФА Тартиб-интизом қўмитаси 2026 йилги Жаҳон чемпионати саралаш турнирининг июнь ойи ўйинларида мухлислар томонидан камситувчи ва ирқий камситишларга йўл қўйгани учун олтита федерацияга, жумладан, Аргентинага катта миқдорда жарималар белгилади. Бу ҳақда ФИФА сайтида хабар берилди.

Санкцияга дучор бўлган бошқа федерациялар қаторига Албания, Чили, Колумбия, Сербия ва Босния ва Герцеговина киради.

Албания федерацияси ирқчилик учун энг катта жарима — 7 июнь куни Сербия билан ўйинда қатор қоидабузарликлар учун 200 минг доллар тўлайди, шунингдек, Латвия билан ўйинда стадион сиғимини 20 фоизга камайтиради.

Аргентина ассоциацияси Колумбияга қарши ўйиндаги ирқчилик учун деярли 150 минг доллар (ва бошқа қоидабузарликлар учун яна 26 минг доллар), чилиликлар аргентиналикларга қарши ўйин учун 143 минг доллар, колумбияликлар Перуга қарши ўйин учун 87 минг доллар жаримага тортилди.

Сербия футбол ассоциацияси Андоррага қарши ўйиндаги воқеалар учун 62 минг доллар тўлаши керак, Босния ва Герцеговина эса Сан-Маринога қарши ўйиндан кейин 26 минг доллар жарима тўлайдиган бўлди.

ФИФА томонидан қўйилган бошқа қоидабузарликлар учун жарималар миқдори камроқ. Масалан, Аргентина пиротехника учун 1200 доллар тўлайди.

Олти рақамдан иборат жарималар ФИФАнинг ирқчилик ва дискриминацияга қарши фаолроқ курашишга тайёрлигини кўрсатади, у ўтган йили ўзининг барча аъзоларини шундай қилишга чақирди, дея қайд этади АP.