Арман Царукян Илия Топурияни октагонга чорлади

"Дэнга раҳмат, унинг шарофати билан бу йил жанг ўтказдим. Менга қарши октагонга чиқишга розилик берган ягона жангчи", - деди Царукян жангдан кейинги интервьюда. - Илия, агар шу ерда бўлсанг, октагонга чиқ! Биринчи рақамли даъвогар фақат битта - Арман Царукян. Мен чемпионлик учун курашишим кераклигини ҳамма билади. Мен тайёрман. Январнинг охирида. Шартнома жўнатинг!".

Эслатиб ўтамиз, Царукян рейтингнинг олтинчи поғонасида бораётган Хукерни иккинчи раундда бўғиш усули билан муддатидан аввал мағлуб этганди.

Беш ойча олдин енгил вазн тоифасида UFC чемпионлигини қўлга киритган Илия Топурия ҳозирда унинг биринчи ҳимоясини ўтказишга тайёрланмоқда. Тахминларга кўра, бу январь ойида Paramount телекомпанияси билан етти миллиард долларлик шартнома доирасида эфирга узатиладиган UFC’нинг биринчи рақамли турнирида содир бўлади.

Норасмий маълумотларга кўра, Топуриянинг бўлажак жангдаги энг эҳтимолий рақиби англиялик Педди Пимблетт (рейтингда 5-ўрин) бўлиб, у оммавий ахборот воситалари учун танланган. Боиси, UFC дарҳол янги платформага максимал томошабинларни жалб қилмоқчи.