Арман Царукян Ислам Махачевнинг ёнини олди

Чемпионлик беллашуви 16 ноябрь куни UFC 322 турнири доирасида бўлиб ўтган ва ўшанда Ислам очколар ҳисобига кўра ғалаба қозониб, ярим ўрта вазн тоифасида UFC чемпионига айланган эди.

"Менимча, Исламнинг жанги жуда яхши эди. У шунчаки октагонга чиқиб, Жекни бутунлай мағлуб этди. Делла Маддалена фақат бўғиш ҳужумига қарши ҳимояланди. Унинг мақсади шунчаки жангдан омон қолиш ва муддатидан олдин енгилмаслик эди. У зарба беришда, курашда ҳеч нарса кўрсата олмади. Ислам шунчаки уни ҳамма нарсада ортда қолдирди. Махачев ажойиб жанг кўрсатди. У ҳақиқатан ҳам ўзининг энг юқори чўққисида; ҳозир уни ҳеч ким тўхтата олмайди.

Лекин томошабин учун бу жуда зерикарли жанг бўлди. Гарчи мен учун ММА мухлиси ва жангчи сифатида бу қизиқ бўлган бўлса-да. Исламнинг мақсади икки карра чемпион бўлиш эди, мухлислар нима дейиши муҳим эмас, чунки улар бир мунча вақт ўтгач, жанг қандай ўтганини унутишади, аммо мерос қолади", дейди Царукян.