Асланбек Шимбергенов Париж Олимпиадасидан «четлатилди»ми?

Қозоғистон бокс федерацияси -71 килограмм вазн тоифасида Қозоғистон терма жамоаси таркибида 2024 йилги Олимпия ўйинлари учун Италияда бўлиб ўтадиган лицензион турнирда кимлар иштирок этиши ҳақида гапирди.

Сўнгги пайтларда ижтимоий тармоқлар ва ОАВда Данияр Елеусинов ҳаваскор боксга қайтиши ва Париждаги Олимпиадада иштирок этиши мумкинлиги ҳақида тез-тез ёзилмоқда. Елеусиновнинг ўзи тез орада янгилик бўлишини айтиб пост қолдирган. Шу муносабат билан мутахассислар Асланбек Шимбергенов ўрнига Рио-де-Жанейро Олимпиадаси чемпиони -71 килограмм вазн тоифасида иштирок этиши мумкинлигини тахмин қилмоқда. Қозоғистон бокс федерацияси матбуот котиби Аян Толеген бу ҳақда расмий баёнот берди.

«Ўтган Спартакиада ғолиблари Италиядаги лицензион турнирга йўл олишади. Асланбек Шимбергенов Спартакиадада қатнашмади. Мураббийлар унга дам беришди, чунки у Осиё ўйинларида энг яхшилардан бири ва медаль совриндори бўлди. Шундай экан, Шимбергеновнинг лицензион турнирга боришига шубҳа йўқ. У нималар қила олишини кўрамиз. Агар ўз вазифасини уддалай олмаса, унинг ўрнига бошқа боксчи келади», - деди Толеген.

Эслатиб ўтамиз, лицензион турнир Италиянинг Бусто-Арсицио шаҳрида 29 февралдан-12 мартга қадар бўлиб ўтади. Ҳар бир вазн тоифасида ярим финалга чиққан боксчилар Парижга йўл олади.