Асу Алмабаевга Рамазон Темиров мағлуб этган рақиб берилди. У Рўзибоев билан бир оқшомда жанг қилади

У 27 июнь куни Бокудаги турнирда октагонга қайтади. Асунинг рақиби эса рейтингда ўн учинчи ўринни эгаллаб турган америкалик Чарльз Жонсон бўлади.

Асу Алмабаев икки ғалабали серия билан келмоқда. У аввалига Хосе Очоани ҳакамларнинг якдил қарори билан мағлуб этган, кейин эса Алекс Перезни гилотина усулида бўғиб қўйганди. Бунгача Асу UFC’даги илк мағлубиятини Мануэль Капедан қабул қилиб олган эди. 

Шу йилниг февраль ойида Алмабаев Мексикада Брендон Моренога қарши турнирнинг асосий жангида октагонга чиқиши керак эди, бироқ қўлидан олган жароҳати сабаб бу тўқнашув амалга ошмай қолганди. 

Эслатиб ўтамиз, ҳамюртимиз Рамазон Темиров сўнгги жангида айнан Чарльз Жонсонни очколар ҳисобига кўра мағлубиятга учратганди. Икки ҳафта олдин Чарльз Бруно Сильва устидан ҳакамларнинг айри қарори билан ғалаба қозонган эди.