Атлетларимиз тош кўтариш бўйича Жаҳон чемпионатида 25 та медаль қўлга киритишди

Ўттизга яқин давлатдан 500 нафарга яқин спортчи қатнашган дунё биринчилигида Воҳиддин Нажмиддинов бошчилигидаги Ўзбекистон терма жамоаси полвонлари ҳам муваффақиятли тарзда иштирок этишди. Мусобақанинг эстафета силтаб кўтариш баҳсларида Шавкат Тўраев, Шоҳруҳ Усмонов, Ғайрат Жабборов, Наврўзбек Охунжонов, Умиджон Собиров, Ойбек Эламонов, Аҳаджон Маматов ва Жавоҳир Эшмаматов биринчи ўринни банд этишди.  

Яна бир қувонарли ҳолат шундаки, Ўзбекистон терма жамоаси таркибида Давлат Хавфсизлик Хизмати спортчилари ҳам медаллар шодасига эга чиқишди. Саидназаров Х. (63 кг), Рўзибоев А. (68 кг), Содиқов Ш. (78 кг), Ҳамдамов М. (85 кг), Худайқулов Ж. (95 кг), Неъматов Р. (90 кг), Жамилов М. (+95 кг), Тошқувватов Б. (+95 кг) ва Қурбонов Ж. (90 кг) ғолиб ва совриндорлар сафидан жой олишди. Улар 6 та олтин, 4 та кумуш, 5 та бронза медалига сазовор бўлишди. 

Тарихда илк бор эстафета силтаб кўтриш йўналишида профессионал жамолар ўртасида Ражаббек Неъматов, Жавоҳир Худойқулов, Баҳриддин Тошқувватов, Мирхон Жамилов олтин медаль қўлга киритишди. 

Шу тариқа, Ўзбекистон терма жамоаси тош кўтариш бўйича Жаҳон чемпионатида 17 та олтин, 5 та кумуш, 3 та бронза медали жамғариб, умумжамоа ҳисобида 2-ўринни эгаллашди. Россия терма жамоаси биринчи, австралиялик спортчилар учинчи ўринни банд этишди.