Australian Open-2024 саралаш босқичига қуръа ташланди. Абдураимова бразилиялик рақибасига қарши кортга чиқади

Бироз аввал йилнинг дастлабки "Катта Дубулға" турнирининг саралаш баҳсларига қуръа ташланди. Айнан эртадан старт оладиган Австралия Очиқ чемпионатининг квалификация турнирида ҳамюртимиз Нигина Абдураимова ҳам иштирок этади. 

Қуръа натижасига кўра, мамлакатимизнинг биринчи ракеткаси Australian Open турнирининг илк даврасида бразилиялик Лаура Пигоссига қарши кортга чиқади. Ушбу баҳс бизнинг вақт билан 9 январь куни тонг саҳарда, соат 04:00да бошланади. 

Таққослаш учун, айни пайтда Нигина Абдураимова WTA рейтингида 210, Лаура Пигосси эса 112-ўринни эгаллаб турибди. Теннисчилар шу кунгача ўзаро учрашишмаган. Бу жуфтлик ғолибаси кейинги босқичда Яна Фетт (Хорватия) - Доминика Салкова (Чехия) учрашувида зафар қучган теннисчига қарши кортга чиқади.      

Эслатиб ўтамиз, Australian Open 2024 турнирининг умумий мукофот жамғармаси 13 фоизга оширилди ва 59,1 миллион долларни ташкил қилади. Чемпионлар 2,153,000 АҚШ долларига эга бўлишади. Финалчи ўз ҳамёнини 1 миллион 179 минг долларга бойитиб олади. Шунчаки биринчи даврадаги иштирок теннисчиларга 82 минг 20 доллар тақдим этади.