Australian Open. Эркаклар ўртасидаги яккалик турнирида чемпион аниқланди

Мукофот жамғармаси деярли 60 миллион АҚШ долларини ташкил этган мусобақанинг сўнгги баҳси эркаклар ўртасидаги яккалик финал учрашуви бўлди. Унда дунёнинг биринчи ва иккинчи ракеткалари - Australian Open турнирининг амалдаги чемпиони италиялик Янник Синнер ҳамда германиялик Александр Зверев ўзаро тўқнаш келди. 

Икки соату 45 дақиқа давом этган баҳсда дунёнинг биринчи ракеткаси Янник Синнер 6/3, 7/6(4), 6/3 ҳисобларида ғалаба қозониб, чемпионлик унвонини муваффақиятли тарзда ҳимоя қилди. Теннисчиларнинг ўзаро учрашувларида ҳамон Зверев олдинда бормоқда - 4:3.

Финал учрашуви статистикаси:

Янник Синнер - 6 та эйс, 2 та қўшхато, 2 та брейк

Александр Зверев - 12 та эйс, 2 та қўшхато, брейк йўқ

Янник кетма-кет 22 та учрашувда Топ-10 рейтингидан ўрин олган рақиблари устидан ғалаба қозонди. Бу XXI аср рекорди ҳисобланади. 2006-2007 йилларда Рожер Федерерда бу кўрсаткич 20 та учрашувни ташкил қилганди. 

Синнер икки ҳафталик меҳнатидан 2000 рейтинг очкоси ва 3 500 000 Австралия доллари (тахминан 2,2 млн АҚШ доллари), Зверев эса 1300 очко ҳамда 1 млн 900 минг Австралия доллари ишлаб олди.