Australian Open. Ҳумоюн Султонов 1/2 финалда камбэк амалга оширганди, аммо...

Ҳамюртимиз Ҳумоюн Султонов Австралия Очиқ чемпионатидаги иштирокини ғалаба билан бошлаб олганди. Мамлакатнинг биринчи ракеткаси саралаш босқичининг илк даврасида рейтингда ўзидан деярли 100 поғона юқорида бораётган колумбиялик Даниэль Элахи Галанни 6/3, 6/7(2), 7/5 ҳисобларида мағлубиятга учратганди.

Афсуски, Ҳумоюн ҳозиргина якунига етган ва 101 дақиқа давом этган учрашувда чехиялик Далибор Сврчинага аламли тарзда имкониятни бой бериб қўйди. Биринчи сетни 3/6 ҳисобида бой берган наманганлик 26 ёшли теннисчимиз камбэк эвазига мувозанатни тиклади - 6/1. Ҳал қилувчи учинчи сетда 3/1 ҳисобида олдинга чиқиб олганди. Аммо жароҳат сабаб муваффақиятни ривожлантира олмади. Тўртинчи геймдан кейин шифокорлардан ёрдам олиб кортга қайтган Султонов 3/6 ҳисобида ютқазди.   

Таққослаш учун, Ҳумоюн Султонов айни пайтда ATP рейтингида 215, унинг биринчи даврадаги рақиби Галан 126, Сврчина эса 228-ўринни эгаллаб турибди. Султонов теннисчиларнинг ўзаро иккинчи учрашувида ҳам чехияликка уч сет натижасига кўра имкониятни бой берди. Далибор 2024 йилнинг 17 ноябрь куни Мумбайдаги турнирнинг финалида ҳам Султоновни таслим этганди.